قصتى مع البرمجة

الموضوع بدأ من يوم ٦-١٠-٢٠١٢ كان يوم عيد ميلادى الـ ١٩ وبما انه عيد ميلادى فطبعاً لازم النكد والتفكير فى الماضى والمستقبل ومحاسبة النفس والطموحات والآمال العريضة وليلة كبيرة سعادتك 😂

أنا كان عندى شغف وحب للكمبيوتر والموبايل وكان بيتملكنى فضول إنى أعرف الحاجات دى بتتعمل ازاى وايه الفكرة بتاعتها وعملوها ليه .. لدرجة انى ببدأ بالفضول ده وأوصل لفلسفات وجودية عن الآلة والزمن والكمبيوتر والموبايل .. وحاجات خيال أوڤر ع الآخر 🤣

فى يوم عيد ميلادى ده كان ليا سنة تقريباً فى كلية علوم.. لكن محبتش الكلية رغم إنى بحب العلم والتفكير العلمى .. ومش بحب الاجابات الدبلوماسيه ولا المنتشرة ولا الموروثة.. بحب أتأكد إن كانت صح بطريقة منطقية وعلمية.. رغم ده فإنى مكنتش عارف أخلى الكلية تبقى لذيذة وعلمية وتشبع فضولى.. كانت مجرد روتين رخم 😑

كنت بروح الكلية دايماً متأخر والحاجات اللى ينفع مروحش كنت بنام أو اقرا ع النت أو أحضر فيديوهات .. لكن حضور الفيديوهات قليل لأنى كنت مشترك فى باقة نت ع الموبايل ..

المهم، يوم عيد ميلادى الـ ١٩ ده كان اليوم اللى قررت فيه أصعب قرار أخدته لحد دلوقتى .. وهو إنى هبدأ أفهم الكمبيوتر والتليفون وأدرسهم.. أنا مكنتش أعرف إن الاتنين فكرة واحده أصلاً 😂

لكن صعوبة القرار كانت إنى هدرس الكمبيوتر من غير ما حد يعرف وهكمل فى الكلية عادى كأنى طالب علوم فى قسم بيولوجى.. لأنى أخدت سنة فى قسم طبيعه وحولت لقسم بيولوجى السنة اللى بعدها

الفكرة فى صعوبة القرار إنى لو فشلت إذن هكمل فى مجالى عادى كـ واحد متخرج من كلية علوم قسم بيولوجى تخصص ميكروبيولوجى، أما لو نجحت هكمل فى البرمجة وتبقى الكلية مجرد شوية خبرات ومعلومات مفيدة اتعلمتها 😍 وشهادة مش هستخدمها.

المشكلة كانت إنى معرفش حاجه عن اللابتوب اللى عندى ده.. ولا الموبايل اللى فإيدى غير إزاى أفتح بعض البرامج واستخدمها.. وفهمى ليهم مجرد تجريب وتعود بدون فهم حقيقى.. عشان كده كنت حاسس إنى هفشل 😥

بعد القرار ده بدأت أجمع معلومات عن الكمبيوتر واستخدامه والبرامج وتعريفات الجهاز.. كل تفكيرى ومعلوماتى اللى جمعتها كانت عن ويندوز بس.. لدرجة إنى كنت متخيل إن كل الأجهزة شغاله بـ ويندوز 😂

فضلت اقرا واحضر فيديوهات.. بس القراءة كانت أكتر.. لكن المشكلة اللى واجهتنى هى اللغة.. مفيش شرح بالعربى لمعظم الحاجات.. مفيش رد على كل الأسئلة اللى عندى..

أنا كنت كويس فى الانجليزي كدراسه مش كـ لغة اعتمد عليها.. يعنى انجح فى الامتحان 😂 بس معرفش اتكلم مع واحد أمريكى مثلاً 😑 ..

كان صعب أحضر فيديو بالإنجليزى لأنى حاولت كتير ومفهمتش حاجه.. فقررت إنى اقرا بالإنجليزى وافهم الكلمة او الجملة وأقلل من الترجمة.. يعنى أحاول معتمدش على إن كل كلمة يقابلها كلمة بالعربى.. لأنى لما كنت بترجم كده مكنتش بفهم حاجه..

فى الأول الموضوع كان صعب وكنت بيأس وأفشل كتير فى إنى أفهم الشروحات اللى بقراها.. لكن مع الوقت كنت بتحسّن ﻷن قريت نفس الموضوع فى شروحات من مواقع ومدونات مختلفة.

قررت إنى اتعلم انجليزى بالكامل.. زى ما اتعلمت عربى.. أنا اتعلمت اللغة العربية إزاى؟! .. كنت طفل وبسمع أصوات واستنتج ان الصوت كذا معناه كرسى وإن الصوت كذا معناه إن حد عايزنى (حد بينده عليا بإسمى)..

وبعد ما دخلت أولى ابتدائى عرفت إن فى حاجه اسمها كلمات وحروف وإن دى مش مجرد أصوات وخلاص .. ودخلنا فى القواعد .. وتركيب الجملة والسؤال وهكذا .. ده تحليلى للى بيحصل لما أى انسان بيتعلم اللغة..

يعنى الحل إنى اتعلم انجليزى هى انى اخد كلمة واعرف هى بتدل على إيه فى البيئة المحيطة بيَّ بغض النظر عن المقابل العربى للكلمة دى.. مثلاً fire هى الشكل ده لما حاجه تتحرق.. مش مهم ان اسمها نار بالعربى..

بدأت اقرا عن العامية الأمريكية واللهجات وأهم الكلمات المستخدمة وحضرت فيديوهات لتعليم اللهجات .. أثناء ما أنا بقرا فى مجال الكمبيوتر وبرامج الكمبيوتر كنت بتعلم انجليزى وعرفت مصطلحات تقنية كتير بالإنجليزى.. لكن عجبتنى جداً برامج التصميم والمونتاج وتعديل الصور..

أخدت فترة طويلة.. أكتر من ٥ شهور مهتم ببرامج تعديل الصور.. كنت بقرا عن البرامج وشروحات استخدامها ومميزات وعيوب كل برنامج .. نزلت كل البرامج اللى لقيتها قدامى واستخدمتهم كلهم .. وكنت بستخدم وأقارن .. مكنش في هدف .. تقدر تقول ان هدفى ضاع منى..

كنت ماشى بالفضول وحب الاستطلاع بس.. صممت صور وعرفت أنواع الصور وامتداداتها والكوديكس.. عرفت معلومات كتير عن الفيديو وتكوينه والمصطلحات بتاعة المونتاج والـ 3d modeling وغيرها من التفاصيل اللى وصلتنى لبرامج الانتاج السينمائى والبرامج الهندسية زى maya و 3d max و autocad وبرامج كتير جداً قريت عنها واستخدمتها ونفذت شروحات كتير عليها..

بدأت أدخل فى جروبات على الفيسبوك عن تعليم الكمبيوتر والبرمجة.. ومن الكلام اللى فى الجروبات دى بدأت افكر أكتر فى طريقة انشاء البرامج مش استخدامها.. الموضوع ده خلانى بدأت اعرف كتير عن البرمجة.. ولأول مرة استوعب ان فى أنظمة تشغيل غير ويندوز 😅

لما بدأت ادخل فى مجال البرمجة حسيت بصعوبة مستفزة.. الشروحات سهله، لكن لما أحاول أعمل الفكرة اللى فى دماغى معرفش 😑 كان موضوع صعب ورخم.. بدأت بالفيجوال بيسك دوت نت .. لأنى أخدت شوية معلومات فى كلية علوم عنه.

بدأت أعمل أفكار برامج تافهه 🤣 بس فى وقتها كانت مهمه بالنسبالى 😂

المشكلة الكبيرة اللى واجهتنى فى وقتها ان كل فكرة أحاول انفذها إما معرفش أو مقدرش أوصل للشكل والطريقة اللى انا عايز البرنامج يظهر ويتصرف بيها 🙄

كنت باخد أيام أفكر فى جزئية واحدة من البرنامج. ومش دايماً كنت بقدر أنفذها. 🙄

دخلت فى جروبات انجليزية عن البرمجة.. وعرفت ان فى حاجه اسمها هاكر.. يعنى ده واحد بيسرق ايميلات الياهو.. ده اللى كنت فاكره وقتها 🤭🤣

كان كل ما حد يكتب بوست اقراه.. واللى معرفوش ابحث عنه.. كنت دايماً ببحث على جوجل .. لدرجة انى قريت عن أفضل الطرق للبحث على جوجل.. وأسرار البحث على جوجل.. المهم وصلت لفهم بعض المعلومات عن طريقة عمل الويب وموقع الفيسبوك تحديداً وازاى ممكن نهكر الفيسبوك 😅

الموضوع خدنى من اهتمامى ببرامج الجرافكس والبرمجة ومسكت فى موضوع الاختراق ده.. برامج الاختراق اللى موجوده ع النت دى عرفتنى على الفيروسات وأنواعها وطريقة التخلص منها .. لأنى كنت بجرب برامج وسكربتات كتير للإختراق وكنت بتعرض لفيروسات كتير من البرامج النصابة دى 😂

المهم فهمت إن أنا مجرد سكربت كيدي 😂 تافه حقير 😂 ملوش أى لازمه فى الحياة 🤣🤣

عرفت إن أنا سكربت كيدى (Script Kiddie) من موقع كان عبارة عن مجموعة من ملفات txt عادية مش html بس مش قادر افتكره ومعرفتش أوصله عن طريق internet archive لكن عموماً قريت معظم الملفات اللى موجوده ع الموقع ده 😎

عرفت إن الاختراق ده بيبقى لأهداف كتير أهمهم التأمين عن طريق معرفة الثغرات وسدها عشان محدش يستغلها، والهدف التانى وهو العقاب والاعتراض زى الاعتراض على سياسات شركة معينة عن طريق اختراقهم بطريقه تخسرهم فلوس أو عملاء 🤫

بعد ما عرفت تصنيفات الهاكرز وأهدافهم.. بدأت افهم واقرا واجرب طرق الاختراق.. اختراق الفيسبوك.. اختراق الواى فاى.. اختراق الأجهزة اللى على نفس الشبكة.. لحد ما وصلت لـ لينكس وخاصة كالى لينكس 🧐

أخدت فترة طويلة فى مجال الهاكر ده وجربت كتير واتعلمت حاجات كتير جداً لحد ما نزلت توزيعة لينكس .. غالباً كانت كالى لينكس أو باك تراك.. واعملت virtual machine وثبتها بعد معاناه لمدة أسبوع فى التحميل والتثبيت والمشاكل واعدادات البيوس (BIOS)..

فضلت أجرب فى توزيعة لينكس دى وامسح وافتح واستخدم واحدث فى برامج وسكربتات كتير.. عدد الشروحات اللى قريتها ونزلتها صعب أعده.. لأنى كنت مش بسيب اللابتوب تقريباً ✋

استوعبت بعد أيام من استخدام لينكس إنى محتاج أتعلم لينكس شغال ازاى؟ وليه فى برامج مش لاقيها عليه؟ وليه ميكونش ويندوز ولينكس حاجه وحدها ونستخدمها عادى؟؟

شوية أسئله تدل إنى مكنتش فاهم أى حاجه وتايه خالص.. المهم بدأت اقرا عن حركة البرمجيات الحرة وجينوم ولينكس وتاريخ لينكس.. وحوار طويل 🤓

المهم فى الوقت ده اتعرفت بالصدفه على بعض المبرمجين اللى بيدرسوا فى حاسبات ومعلومات.. وكان واحد فيهم خلص كلية وهيبدأ شغل..

فهمت شوية حاجات عن البرمجة من الكلام معاهم ونصايحهم.. وعرفت شوية حاجات عن التوظيف.. وبدأت أرجع للفكرة الأولى بتاعتى وهى انى اتعلم ازاى اعمل برامج 🤔

قريت شوية عن لغات البرمجة زى c و c++ و fortran و visual basic و c# .. نفذت شروحات كتير جداً بلغات مختلفة لكن كنت بقدر اعمل برامج ب vb .net أفضل.. طبعاً لأنها أسهل 😂😂

بس بعدها بدأت اقرا عن الإنترنت والشبكات وازاى الكمبيوتر بيتوصل بكمبيوتر تانى.. ودخلت فى ليلة كبيرة تانى.. فضلت اقرا وأربط المعلومات ببعض 🤓

اهتميت بمجال تطوير المواقع والويب ودرست html و css وجربت كتيييير اعمل مواقع بيهم.. وفضلت اتعلم xhtml بعد xml و javascript وتوهت فى الجافاسكربت والليلة الكبيرة بتاعتها.. بس طنشتها ومسكت فى الباك اند وتحديداً php وجافا و c# بس حبيت php أكتر 💜

أول مرة أحس ان البرمجة سهله لما عملت صفحات ويب.. 💜

بدأت فى الوقت ده اكتب تدوينات على مدونة على wordpress وبعدها حولت لموقع blogger ولاحظت انى بفهم المعلومة وبتلزق فى دماغى أكتر لما أدرسها وأفهمها وبعد كده أشرحها لحد تانى أو أنشر تدوينة شرح ليها 😍

حبيت التدوين لكن كنت بركز على تصميم الثيمز والقوالب .. لكن مع الوقت بدأت أهتم بالتدوين والأرشفة والسيو.. اتعلمت حاجات كتير جداً وعملت تجارب عن السيو والأرشفه وبتابع حتى الآن كتير من خبراء السيو زى نيل باتيل وبراين دين.

بعد كده دخلت فى مجال الأندرويد بلغة جافا وعملت تطبيقات كتير هتلاقى بعضها على حسابى على جوجل بلاى.

وعملت مواقع كتير منهم موقع ابانوب حنا للبرمجيات اللى انت بتقرا عليه دلوقتى.

واتعلمت كتير عن ازاى الهاردوير بيسمع كلام السوفت وير .. ازاى البروسيسور بيشتغل.. ومكونات الأجهزة موبايل أو لابتوب.. وأخدت فترة مهتم بالسيرفرات.

لحد يوم ٦-١٠-٢٠١٧ كنت لسه فى مرحلة التجريب والمحاولة.. لكن يوم عيد ميلادى الـ ٢٤ فى سنة ٢٠١٧ قررت إنى مبرمج .. وإنى هكمل فى مجال برمجة الويب وبرمجة الأندرويد كمجالات برمجة أسياسية بالنسبالى..

تطوير برامج لينكس أو ويندوز أو ماك شئ حلو.. لكن أنا قررت إنه مش هيكون شئ أساسى بالنسبالى. لكن فى المستقبل إن شاء الله ههتم ببرمجة الآيباد لأنى شايف إن التابلت هو المستقبل.

وأنا الآن فى يوم ٦-٦-٢٠١٩ بكتب قصتى مع البرمجة بإختصار شديد جداً. فى النهاية أحب أقول إنى بدأت بمجرد فضول ودخلت فى مجالات كتير وضاع وقت طويل وتشتت تركيزى كتير وأخدت شهادات كتير (أنا معتبرها مش مهمه) وأخدت خبرة كبيرة فى مجالات كتير جداً 😀

أنا راضى عن اللى عملته رغم التشتت وتضييع الوقت فى الدراسات المختلفة والمتباعدة .. لأنى اتعلمت أخيراً انى أركز فى حاجه واحدة وأخليها أفضل شئ يمكن انتاجه 💜 بدل ما أعمل ١٠٠ حاجه ملهمش أى تلاتين لزمة ✋

فى الرحلة دى اللى بدأت من أكتر من 7 سنوات أنا أخدت كورسات كتير فى جامعات أون لاين وعلى مواقع زى كورسيرا واليوتيوب وأوداسيتى وعملت مشاريع برمجية كتير جداً.. وإن شاء الله هستمر فى التحسن والتعمق فى تطبيق البرمجة لتحسين حياة الناس وتسهيل حياتنا.