ليه البرامج فيها مشاكل كتير كده ؟؟؟

تفتح تطبيق الفيسبوك على موبايلك تلاقيه مش راضي يفتح .. تدوس على تبويب الفيديوهات تلاقي الفيديو مش راضي يحمّل .. تفتح تطبيق ماسنجر عشان تبعت رسالة لصاحبك تلاقي صاحبك مردش! ليه؟ عشان الماسنجر موصلش الرسالة أصلاً .. تفتح تطبيق يوتيوب وتفتح فيديو ، عايز تكتب كومنت ، تعمل سكرول عشان تنزل للكومنتات تلاقي اليوتيوب بيعمل سكرول في الإتجاه العكسي شوية وفي الإتجاه الصحيح شوية .. فتكبر دماغك وتنسى حوار الكومنت ده ..

تروح ترمي الموبايل وتمسك اللابتوب وتفتح فيلم وتلاقي برنامج تشغيل الفيديوهات يقولك الصيغة غير مدعومة .. تفتح الفيديو على مشغل فيديوهات تاني عندك برضو تلاقي الصورة والصوت مش متظبطين على بعض .. تفتح الفيديو على مشغل فيديوهات تالت تلاقي الفيلم شغال تمام .. تفتح جوجل كروم عشان تبحث على حاجة يقولك مفيش انترنت .. تروح تفتح متصفح ايدج يبحثلك على محرك البحث بنج ..

تشغل البلوتوث عشان تبعت حاجه من موبايلك للابتوب تلاقي البلوتوث مش شغال مع إنه كان شغال كويس إمبارح .. تروح تغير رأيك وتفتح فيسبوك على متصفح ايدج وتفضل مستني البوستات عشان تظهر .. تلاقيه بيقولك الصفحة خلّت المتصفح يهنج .. وتختار تعيد فتح المتصفح .. تلاقي الجهاز بيطلب منك تعمل ريستارت عشان يثبت التحديثات اللي نزلت .. تدوس تحديث تلاقي الجهاز قفل واشتغل تاني بس واقف على صفحة مكتوب فيها "متقفلش الجهاز واستنى لحد ما التحديثات تتثبت" .. تروح تسأل "ليه البرامج فيها كل المشاكل دي؟؟؟".

كل الشركات بما فيها شركات البرمجة ماشية بمبدأ جديد اسمه "move fast and break things" يعني امشي بسرعة وكسر أي حاجة .. يعني ضيف مميزات للبرنامج ومش مهم لو في حاجة باظت وانت شغال .. المهم انك تتطور وتضيف مميزات .. مش ضروري تعمل اختبار لكل التفاصيل لأن ده هياخد وقت طويل واحنا عايزين نخلص الميزة دي بسرعة .. المبرمجين بطّلوا يهتموا بإستقرار البرامج — زي ما بيقول درو ديڤولت في مدونته.

احنا محتاجين نهتم بتجربة المستخدم .. محتاجين نهتم بالمستخدمين .. هل المستخدم فاهم المفروض يعمل ايه ولا مش عارف البرنامج شغال إزاي؟؟؟ .. محتاجين نهتم بعمل تجربة استخدام سهلة وبسيطة وسريعة وخالية من المشاكل والأخطاء .. وعند حدوث أخطاء أو مشاكل في البرنامج ، تظهرلك رسالة خطأ واضحة وفيها طريقة الحل أو اقتراح صحيح للحل أو طريقة التواصل مع المبرمج أو الشركة للحصول على حل للمشكلة.. جو شقلب وارمي ده مش هينفع يكمّل!!

فكرة انك تعمل أداة برمجية الأول قبل الناس ده كان مفيد لما مكانش في حد غيرك .. دلوقتي احنا بدأنا نركز على الأفضل من بين المعروض .. في الحياة بييجي أولاً الكم وبعد كده بييجي الكيف .. يعني لما الكمية تكتر ، الناس بتدور ع الجودة .. يعني احنا في طريقنا للجودة .. مع استمرار وصول المنتجات والخدمات للناس ووجود منافسين ليك هتحتاج ترجع تظبط تجربة الاستخدام عشان تقدر تكمل من غير ما تخسر المستخدمين .. نصيحتي ليك ابدأ تهتم بتجربة الاستخدام من دلوقتي.

إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا. لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن "موقع أبانوب حنا للبرمجيات" على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.

هناك تعليق واحد:

  1. Sands Casino | New Jersey Online Casino
    Sands 카지노사이트 Casino is a New Jersey online casino offering 100+ slots, 50+ live dealer septcasino games and a variety of table games including blackjack, roulette and 1xbet

    ردحذف